رنگِ مصوّر

غزل میں رنگ مصور کا ہوگا سب سے الگ

زمانہ بھر سے جدا، طرزِگفتگو ہوگی

رنگِ مصوّر

تیرے خیال میں جو دل سے گفتگو ہوگی

وہ ایک محفل دنیائے آرزو ہوگی

بیاں نہ دل سے کبھی، دلکی آرزو ہوگی

امید و بیم کی تصویر روبرو ہوگی

کسی سے ملنے کی جب دلکو آرزو ہوگی

خیال ہی میں محبت کی گفتگو ہوگی

ہماری خاک میں بھی ہے اثر محبت کا

اٹھا کے سونگھئے اسمیں وفا کی بو ہوگی

رہِ طلب میں جو بیٹھیں گے پائوں توڑ کے ہم

رہِ خیال میں پھر تیری جستجو ہوگی

عجیب ہے دل حسرت نصیب کی حسرت

کہ یاس موجبِ تکمیل آرزو ہوگی

وہی خزاں میں چلینگے، نسیم کے جھونکے

ہو ا چمن کی نہ پابندِ رنگ و بوُ ہوگی

رہِ وفا میں جو ناکامیوں کا ساتھ رہا

نہ ہم رہینگے نہ پھر تیری جستجو ہوگی

نظر گُلوں پہ جو ڈالیں گے، ہم مآل اندیش

زبانِ خار پہ تفصلِ رنگ و بو ہوگی

رہ فنا میں بگولوں کو یاد آئینگے

جو ہم نہونگے تو پھر کسکی جستجو ہوگی

رہِ نیاز میں ڈھونڈھیں کے تجھکو ہم مٹکر

ہماری خاک بھی سرگرمِ جستجو ہوگی

غزل میں رنگ مصور کا ہوگا سب سے الگ

زمانہ بھر سے جدا، طرزِگفتگو ہوگی

رنگ مصور

کیا پوچھتے ہو تم حسن بیاں کیا دیکھتے ہو تم رنگ زباں

ہے یہ بھی کمال مصور کا تصویرمیں رنگ جو بھرتے ہیں

رنگ مصور

جو شبھے دل میں آتے ہیں جو دلمیں وہم گزرتے ہیں

تصویر یقیں بنجاتے ہیں وہ جب تمپہ نظرکرتے ہیں

کچھ سانسیں لیتے جاتے ہیں سامان یہ سفرکاکرتے ہیں

یوں یوں آہستہ آہستہ ہم ہستی کے پل سے گذرتے ہیں

ناکام تمہارے، فرقت میں دکھ درد میں اس تنہائی میں

سن لو تو کبھی کیا کہتے ہیں پوچھو تو کبھی کیا کرتے ہیں

پردہ جو اٹھے ہوجائے یقیں وہ اور نہیں ہم اور نہیں

دیکھیں ہو جوچشم حقیقت ہیں صورت پہ خود اپنی مرتے ہیں

اے رہرو ہمت ہارونہ تم امید برآئیگی تھک کر

مقصود کو اپنے پاتے ہیں جو قطع منازل کرتے ہیں

اے باد صبا کے جھونکو تم بیداد سے اب یہ کہدینا

جوآس پہ تیری جیتے تھے وہ ٹھنڈی سانسیں بھرتے ہیں

اک راز ہے انسان کی ہستی خاموش بھی ہے گویا بھی ہے

وہ کس سے کہے کس نہ کہے صدمے جو دل پہ گذرتے ہیں

گل آنسوئوں کے وہ تربت پر آئے ہیں چڑھانے کیا حاصل

ان چھینٹونسے کیا ہوتا ہے اب ٹھنڈی سانسیں بھرتے ہیں

اب آنکھیں کھولے دیتے ہیں گذرے ہوئے لمحے یاد آکر

کیا کرچکے ہم کیا کرنا تھا کیا کرنا ہے کیا کرتے ہیں

کیا پوچھتے ہو تم حسن بیاں کیا دیکھتے ہو تم رنگ زباں

ہے یہ بھی کمال مصور کا تصویرمیں رنگ جو بھرتے ہیں

HomePage ہوم پیج

http://mosawwerhomepage.blogspot.com/