خونِ تمنّا

ہرایک سے پوچھتا ہوں بیخودی میں

جسے دل ڈھونڈتا ہے وہ کہاں ہے

خونِ تمنّا کوئی پرساں کسی کا اب کہاں ہے

مدد اے بیکسی، وقتِ فغاں ہے

مری حالت پہ دنیا مہرباں ہے

دوائے دل مرا دردِ نہاں ہے

فلک پیما جو ہر عزمِ نہاں ہے

زمیں کو دیکھتا ہوں آسماں ہے

مرا دل بے نیاز این و آں ہے

کہ اب محوِ خدائے دوجہاں ہے

وطن ہی کی طرف بڑھتی ہے پیہم

تمنا خیز گرد کارواں ہے

غمِ سیلاب و خوفِ برق و صرصر

اسی جھرمٹ میں اپنا آشیاں ہے

ہرایک سے پوچھتا ہوں بیخودی میں

جسے دل ڈھونڈتا ہے وہ کہاں ہے

جہاں سجدے کیے تھے بیخودی میں

وہاں اب آستاں ہی آستاں ہے

کیا ہے عمر بھر خونِ تمنّا

اسی عنواں سے رنگیں داستاں ہے

عیاں کرتا ہے حالِ سوزِ الفت

شرارِ سنگ بھی اتش زباں ہے

وہ مجھسے پوچھتے ہیں حال میرا

کوئی یوں بھی کسی سے بدگماں ہے

وہاں بجلی گریگی،اک نہ اک دن

جہاں آج آشیاں ہی آشیاں ہے

ہوئی جاتی ہے گل، اب شمعء ہستی

نسیم صبح کیوں دامن کشاں ہے

مرا اس شاخ پر کل آشیاں تھا

ابھی غیروں کا جسپر آشیاں ہے

مصور فن میں کامل ہوگئے تم

یہ اعجازِ امیرِ نکتہ داں ہے

HomePage ہوم پیج مخزن غزلیات: سرورق