خلش

حسرتِ دید میں برباد جو ہوجاتے ہم

پھر تو ہر ذرہ ء دل منظر سینا ہوتا

خلش

خلشِ غم کی جو لذت میں اضافا ہوتا

پھول ہوتا وہ مرے حق میں جو کانٹا ہوتا

رازِ سربستہ زمانہ پہ ہویدا ہوتا

دلِ خاموش کبھی تُوبھی تو گویا ہوتا

کرکے برباد جو تو محو تماشا ہوتا

مٹکے دنیا سے کوئی حاصلِ دنیا ہوتا

یوں نہ پھر نقش بدل منظر دنیا ہوتا

ہوکے بیگانہ جو میں تجھسے شناسا ہوتا

بے نیازی کی ادا اس سے نمایاں ہوتی

طالبِ دوست اگر طالبِ دنیا ہوتا

اب مری آنکھ کو ہے اشک کی حسرت یارب

ہائے وہ دل کی جو یوں صرفِ تمنّا ہوتا

ہم کسیکے بھی نہ شرمندہ ء احساں ہوتے

جو نفس عشق میں آتا دمِ عیسٰے ہوتا

کردیا تونے یہ کیا اے دلِ ہنگامہ طلب

مقتضا راز کا یہ تھا کہ وہ اخفا ہوتا

یاد رہ رہکے مجھے عہدِ وفا آتا ہے

وعدہ وعدہ ہی وہ کیا تھا جو ایفا ہوتا

حسرتِ دید میں برباد جو ہوجاتے ہم

پھر تو ہر ذرہ ء دل منظر سینا ہوتا

اشکِ حسرت ہی سے ہم کاش نمایاں کرتے

اپنی ہستی کے تغیّیر کا جو منشاء ہوتا

ہوتے ہم چشمِ حقیقت میں مصوّر ممتاز

 گر زمانہِ نے نہ نظروں سے گرایا ہوتا

Home Page ہوم پیج

http://mosawwerhomepage.blogspot.com/