چشم حقیقت

ہوتی حاصل نہ ہم آغوشی ء گرداب فنا

ڈوبتے کو جو نہ تنکے کا سہارا ہوتا

چشم حقیقت

یاس انگیز نگاہوں سے جو دیکھا ہوتا

غیر پھر عالمِ ایجاد کا ۔۔ نقشا ہوتا

اک نظر چشم حقیقت سے جو دیکھا ہوتا

یہ جہاں اپنا ہی پرتو نظر آیا ہوتا

زندگی ہم جو طلب کرتے، اجل آجاتی

تجھ سے حاصل، یہ نیرنگی ء دنیا ہوتا

بے ثباتی نظر آتی ہمیں ہر ذرّہ میں

ہمنے دنیا کو اِس انداز سے دیکھا ہوتا

کچھ تو ہے قابل غور، دل بیتاب جو ہے محو جمود

اسکی تکمیل بھی ہوتی جو ارادا ہوتا

خود ہوس ہی مری ہوجاتی حریفِ مقصود

کام دنیا میں اگر حسبِ تمنا ہوتا

لاکھ اے پنجہ ء تدبیر مٹاتا اُسکو

وہ نہ مٹتا مری قسمت کا جو لکھا ہوتا

آپ ہوجاتے جو ہم راہ روِ جادہ ء یاس

ہر قدم باعثِ تجدید تمنّا ہوتا

یہ زمیں مائل پروازِ فلک ہوجاتی

قصد اپنا جو سوُئے عالمِ بالا ہوتا

حرفِ مطلب بھی زباں پر نہیں آتا یا رب

اس سے بہتر تھا کہ محرومِ تمنّا ہوتا

نگہ ء باز پسیں اتنی تھی مہلت تجھکو

ایک جنبش میں یہ عالم تہ و بالا ہوتا

ہوتی حاصل نہ ہم آغوشی ء گرداب فنا

ڈوبتے کو جو نہ تنکے کا سہارا ہوتا

تجھ میں پنہاں ہیں حقیقت کے ہزاروں جلوے

دیکھتا تجھکو تو آئینہ کو سکتا ہوتا

لختِ دل اپنا سمجھتے جو ہر اک ذرّہ کو

پھر تو یہ عالمِ امکاں بھی ہمارا ہوتا

اپنی ہستی کو سمجھتا ہے مصوّر تو کچھ

اس سمجھنے سے تو بہتر تھا نہ سمجھا ہوتا

Home Page ہوم پیج

http://mosawwerhomepage.blogspot.com/