تمنّا

جو کہہ رہا ہوں وہ بھی تغیّر پذیر ہے

کس بات کا زمانے میں *دعوا کرے کوئی

تمنّا

یہ کیا کہ خونِ عشق میں رویا کرے کوئی

برباد خود جہانِ تمنّا کرے کوئی

پھر کیوں مذاقِ عشق کو رسوا کرے کوئی

دل سے بیاں جو دلکی تمنّا کرے کوئی

سب اک طرف مرا دلِ خود دار اک طرف

میرے لیے برا ہو، جو اچھا کرے کوئی

اے بے نیاز تو اسے توفیق شکر دے

یہ وہ زباں نہیں ہے کہ شکوہ کرے کوئی

اب اسکو جذب کرلے تجلّیء حسن میں

یوں دلمیں رہکے دل سے نہ پروا کرے کوئی

اے وضعِ عشق پاس رہے، شان حسن کا

اب آرزو یہ ہے کہ تمنّا کرے کوئی

ہر اشکِ خوں میں دیکھ کے امّید کی جھلک

اندازہء فریبِ تمنّا کرے کوئی

حاملِ تجلّیات کا بنجائے ہرنفس

اتنا تو سوز، قلب میں پیدا کرے کوئی

پھر ہے دلِ تباہ کو تعمیر کا خیال

دنیا سے مٹ کے حسرتِ دنیا کرے کوئی

دیکھے *مآلِ عشق کہ آغاز برقِ حسن

اک فرصتِ نگاہ میں کیا کرے کوئی

ہم جان لیں کہ دید کا ارماں نظر میں ہے

پردے حریمِ حسن کے پیدا کرے کوئی

دیکھ اٹھ رہی ہے، روئے حقیقت سے وہ نقاب

اب اے نگاہِ شوق بتا، کیا کرے کوئی

فرصت کہاں نگاہ کو نیرنگِ دہر سے

کیا امتیازِ منظرِ دنیا کرے کوئی

یاد آئیں جب زمانہء ماضی کی حسرتیں

دلکو  زبانِ حال سے گویا کرے کوئی

تکمیلِ شرح عشق کا امکان ہو اگر

ظاہر کسی پہ دل کی تمنّا کرے کوئی

بہتر ہے ڈوب جائے جو، طوفانِ اشک میں

یوں  خاطرِ تلاطم دریا کرے کوئی

یہ ابتدائے درد ہے اک انتہائے شوق

دل یوں نثار جانِ تمنّا کرے کوئی

جو کہہ رہا ہوں وہ بھی تغیّر پذیر ہے

کس بات کا زمانے میں *دعوا کرے کوئی

کہنے کی تھی جو بات، مصور نہ کہہ سکے

اندازہء کمالِ سخن، کیا کرے کوئی

آسان اردو – جستجو میڈیا

مآل – نتیجہ، انجام*

دعوا = دعویٰ*