منزلِ نو

ایدل تو اس جہاں میں وہ منزل تلاش کر

گزرا نہ ہو جہاں سے کبھی کارواں کوئی

منزلِ نو

کہتا نہیں ہے دل سے تری داستاں کوئی

دنیا میں اب نہیں ہے، مرا ہمزباں کوئی

رکھدے جبینِ عجز سرِ آستاں کوئی

پھر مہرباں کوئی ہو، کہ نامہرباں کوئی

آنکھیں ہوں گر تو انکو یہی جستجو رہے

ہوتا ہے ذرہ ذرہ سے کیونکر عیاں کوئی

اب اعتماد محرم و ہمراز کیا کہوں

مجھکو سنا رہا ہے مری داستاں کوئی

ہو پست اپنی ہمت عالی کا مرتبہ

سر پر اگر محیط نہو آسماں کوئی

مانا یہی ہے نقشہء نیرنگئی چمن

کبتک رہے رہینِ بہاروخزاں کوئی

بربادیاں بھی اپنی، چمن میں ہیں لازمی

ہم بھی یہاں بنائیں گے، اب آشیاں کوئی

سب سے رہِ وفا میں یہی کہہ رہا ہونمیں

اپنا تو اس جہاں میں نہ ہو، پاسباں کوئی

وہ بے نشاں رہے، نہ کچھ اسکا نشاں رہے

اسطرح مل کے خاکمیں ہو بے نشاں کوئی

شاید سکوتِ رنج مرے *دلپہ چھاگیا

آتی نہیں ہے آج تو لب تک فغاں کوئی

اف گلستانِ دہر کی یہ بے ثباتیاں

کرتا رہا بہار میں یادِ خزاں کوئی

غم بھی ہے بے ثبات، خوشی بھی ہے بے ثبات

دنیا میں کیا سمجھ کے رہے شادماں کوئی

کافی نہیں ستم کیلئے اسقدر فضا

تعمیر کررہا ہے نیا آسماں کوئی

کیوں اپنی خستہ پائی پہ ایسے اداس ہے

بنجائے کاش گردِ رہِ کارواں کوئی

دل کی حدونسے اپنی ہی دنیائے شوق میں

پھرتا ہے لیکے وسعتِ کون و مکاں کوئی

یوں مجکو اپنی ہستیءفانی پہ ناز ہے

یہ جانتا ہونمیں کہ نہیں جاوداں کوئی

مری جبیں ہے وقت ترے در کے واسطے

موزوں نہین ہے اسکے لیے آستاں کوئی

ایدل تو اس جہاں میں وہ منزل تلاش کر

گزرا نہ ہو جہاں سے کبھی کارواں کوئی

میں ساری کائنات کا ہوں نقطہء نگاہ

اس امتحان سے بڑھکے نہیں، امتحاں کوئی

تجھپر امیر ملک معانی کی ہے نظر

تجھ سا مصور اب نہیں، معجز بیاں کوئی

دلپہ= دل پر، دل پہ*

HomePage ہوم پیج مخزن غزلیات: سرورق