مسلم قوم سے خطاب

عدل  سیکھا ہے زمانے نے ترے اسلاف سے

حیف تجھ پر ہے اگر دنیا میں تو عادل نہو

مسلم  قوم سے خطاب

سرنگوں  تھیں تیرے قدموں میں جہاں کی سطوتیں

عظمتِ  ماضی کو اپنی یاد کرغافل نہو

تو ابھی تاریکیء ہجراں سمجھتا ہے جسے

وہ  حقیقت میں فریبِ ظلمتِ باطل نہو

منزل مقصد جسے سمجھا کیا تو آج تک

وہ بھی اے غافل فریبِ سعیء لاحاصل نہو

تو  کہ ماضی میں رہا ہے منتہائے کائنات

آنے والے وقت سے بھی اسقدر غافل نہو

دولتِ دنیا طلب کرتا ہے تو کیوں غیر سے

جو ترے قدموں میں ہے اس چیز کا سائل نہو

عدل  سیکھا ہے زمانے نے ترے اسلاف سے

حیف تجھ پر ہے اگر دنیا میں تو عادل نہو

دیکھتا ہے اہلِ یورپ کی بہت آرائشیں

اسمیں بربادی ترے ایمان کی شامل نہو

دیکھ نیرنگ زمانہ چشمِ عبرت کھول کر

تو مگر تہذیب یورپ کا کبھی قائل نہو

گامزن راہِ ترقّی میں ہو، ماضی کو نہ بھول

حال  میں تو محوِ جولانگاہ مستقبل نہو

دیکھ  تو اپنے حریفوں کا علو مرتبت

یوں  خرابِ افتخار بحث لاطائل نہو

ڈٰھونڈھ  صحرائے عمل تو، منزلِ عشرت کو چھوڑ

اسکے تو قابل نہ ہو، یا یہ ترے قابل نہو

سونچ  اتنا تو دل میں تو رقصِ حسیناں دیکھکر

تیری  ہستی بے نیازِ ملّت بسمل نہو

دیکھ  چشمِ غور سے تو رنگ روئے گلرخاں

اس  میں خون ملت بیضا کا ہے، تو غافل نہو

تو ہی اپنی راہ میں خود ہورہا ہے سدِ راہ

تو اگر حائل نہو، تو ُپھر کوئی حائل نہو

تجھ میں گر شمع شبستاں کی سی تابانی نہیں

پھر چراغِ گور بنجا، درخورِ محفل نہو

کیوں  سہارا ڈھونڈتا ہے، غیر کا طوفان میں

غرق ہی ہو جا، کہ تجھکو حسرتِ ساحل نہو

بے  حمیت تیغِ غیرت سے گلا خود کاٹ لے

جان  ہی دینا ہے تو، منت کش قاتل نہو

ہوش  میں آ ! کر حقیقت پر نظر مجنوں نہ بن

اب  رہینِ جستجوئے لیلیٰ محمل نہو

آسان اردو-جستجو میڈیا

لاطائل = خیال باطل ۔ وہم ۔ خال لاطائل