آشیانہ

متاعِ دل ملا کر خاک میں یوں شادہوں یارب

تصرّف ہے مجھے اب سارے عالم کے خزانے پر

آشیانہ

عبث مغرور ہے تو اے فلک بجلی گرانے پر

بنائے جائینگے ہم آشیانہ آشیانے پر

زمانہ ہورہا ہے متحد میرے مٹانے پر

مجھے دیکھو کہ اب چھایا ہواہوں میں زمانے پر

فسانہ ہی وہ مری حسرتِ دل کا فسانہ ہے

ٹپک پڑتے ہیں دو آنسو لہوکے جس فسانے پر

ابھی اہلِ وطن دلسے بھلالیں جسقدر چاہیں

بہت یاد آئونگا وفائیں یاد آنے پر

میرا شیرازہ ء ہستی بکھر جائے نہ دم بھر میں

مجھے رہتا ہے یہ کھٹکا نفس کے آنے جانے پر

مسرّت کی کرن اک دلسے اٹھنا ہی قیامت تھی

ہزاروں بجلیاں اب کَوندتی ہیں آشیانے پر

محبّت کا لہو اب دوڑتا ہے نبضِ ہستی میں

مسرّت رقص کرتی ہے مرے غم کے ترانے پر

نہیں ہے قابل عبرت مری حالت اگر ایدل

زمانہ رورہا ہے کیوں مرے آنسو بہانے پر

نہ بنکر خاک تیرے سنگِ در میں جذب ہوجائوں

تجھے میں چھوڑ کر اب جائوں کس کے آستانے پر

یہ کس دل سے کہوں افسانہ ء سوز دروں کیا ہے

میں رودیتا ہوں اکثر شمع کے آنسو بہانے پر

محبّت میں تری ٹھکراکے سارے آستانوں کو

سرتسلیم خم کرتا ہوں ترے آستانے پر

سمجھ کر سوچ کر دل میں خوشی کے ولولے اٹھیں

نمایاں خونِ حسرت ہے فلک کے شامیانے پر

متاعِ دل ملا کر خاک میں یوں شادہوں یارب

تصرّف ہے مجھے اب سارے عالم کے خزانے پر

جلا ڈالا اُسے اے برق، یہ احساں کیا تونے

مجھے رہکر چمن میں ناز تھا کچھ آشیانے پر

کہاں ہے اے جمود مستقل، زنجیرِ پا بن جا

وہ آمادہ ہیں مجھکو اپنے مرکز سے ہٹانے پر

اگر وہ مٹگیا تو لوحِ عالم پر عیاں ہوگا

زمانہ مستعد ہے کیا مصوّر کے مٹانے پر

Homepage ہوم پیج

http://mosawwerhomepage.blogspot.com/