سکندرِ دو عالم

تجھے دیکھا کریں حیرت سے سارے دیکھنے والے

نئے انداز سے پھر دہر میں تو جلوہ گستر ہو

سکندرِ دو عالم

تجھے خلوت میں کچھ اہلِ وطن کا بھی خیال آئے

بجائے سیج کانٹوں کی، ترا پھولوں کا بستر ہو

نہیں زیبا تجھے مشرق کو صرف اپنا وطن کہنا

تعین کی حدوں کوتوڑدے عالم کا سَروَر ہو

جو ہو یوں جوہرِ تیغ، تیغِ زباں سے فتح مُلکِ دل

بجا ہے گر شہنشاہ سخن تجھسا سخنور ہو

یہ ظاہر ہے کوئی بیحس جہاں میں جی نہیں سکتا

سکون یاس کیا اب آشنائے قلبِ مضطر ہو

ترے احساس کی بے وقعتی نہیں جاتی

دکھا جذبات وہ جسپر فدا اندازِ محشر ہو

اگر اپنے صفائے قلب سے اُسکی جِلا کردے

یہ ممکن ہے تو ہی دو عالم کا سکندر ہو

جو تو ہستی میں ہے، تو مٹادے کفرکی مستی

علم و تیغ کر جسمیں ترے ایماں کا جوہر ہو

جہاں کی طاقتیں ہیں متحد ترے مٹانے پر

کہ اب چلتی ہوئی تلوار ہو، رفتارخنجر ہو

ترے ان بازوئوں میں قوت، حق کی ودیعت ہے

ارے نا آشنا، تو رازدار فتح خیبر ہو

اگر کچھ پرتوء اسلام تیرے دلمیں باقی ہے

تو ایماں کی ضیاء میں حامیء دین پیمبر ہو

سناکر اپنے لہجہ میں وہی پیغامِ روحانی

مٹا باطل کو ہستی سے جہانمیں حق کا مظہر ہو

تجھے دیکھا کریں حیرت سے سارے دیکھنے والے

نئے انداز سے پھر دہر میں تو جلوہ گستر ہو

تو چشمِ فیض سے اپنی وہ کر خورشیدِ نو پیدا

کہ جس کے سامنے ذرّہ سے کم خورشیدِ خاور ہو

لگے خونِ اخوت دوڑنے پھر نبضِ ملّت میں

وہ اعجازِ نفس سے تو نسیم روح پرور ہو

قسم ہے اسکی وحدت کی تجھے، یہ تفرقہ کیا ہے

مےء توحید پیکر مشرق و مغرب کا رہبرہو

اگر آندھی چمن کی تجھکو چاہے منتشر کرنا

پئے جمعیت دل پیکر اضدادِ صر صر ہو

مسلط طاقتیں سب کفر کی جب تجھ پر ہوجائیں

زباں پر تیری اس دم نعرہء اللہ اکبر ہو

عجب کیا ہے زمانِ حال کی سرگرمیوں ہی میں

درخشاں، بیخبر، ترے ہی مستقبل کا منظر ہو

علوِ فکر کا تیری تقاضا ہے، یہی تجھ سے

تری حدِ تخیل ماورائے چرخ اخضر ہو

آسان اردو – جستجو میڈیا

سَرْوَر ، سَرْوَری: ۔۔ فارسی زبان سے ماخوذ اسم 'سرور' کے ساتھ 'ی' بطور لاحقہ کیفیت لگانے سے بنا۔ اردو میں بطور اسم استعمال ہوتا ہے۔ اسم  کیفیت ۔ مؤنث - واحد   سرداری، قیادت، حکومت، بادشاہت، پیشوائی۔

پَرْتَو-(اسم) راس:پَرْتَو-عکس، پرچھانواں، سایہ۔ ۔ ۔ ۔

خاور = مشرقی، مشرق

پَئے-[پَئے] فارسی

لیے، واسطے

چرخ اخضر= نیلا آسمان، بظاہر نیلا، مگر اخضر عربی میں ہرے رنگ کو کہتے ہیں