غبارِ کارواں

ہم غبارِ کارواں کو دور تک دیکھا کیے

ہائے ہمکو چھوڑکر یوں کارواں چلتاہوا

غبارِ کارواں

مٹ کے بھی جو اس جہاں میں حاصلِ عقبٰی ہوا

تو ہوا اے دل کہ نقشِ عبرتِ دنیا ہوا

رنجِ ماضی یاد آتے ہی ہمیں یہ کیا ہوا

یک بیک دلمیں خیال کاوش فردا ہوا

دیکھنے والے نگاہ لطف سے یہ کیا ہوا

ہائے دم بھرمیں نظام دل تہ و بالاہوا

غم ملا مجھکو، مشیت نے کہا اچھاہوا

سب یہ کہتے رہ گئے بیجا ہوا، بیجا ہوا

رنگِ عالم اب نظر آتا ہے کیوں بدلا ہوا

سوچتاہوں میں یکایک دلکو مرے کیا ہوا

بنکے وہ نقش وفا لوحِ جہاں پر رہ گیا

خود ہمارا دل حریفِ پائے استغنا ہوا

ذرہ ذرہ میں نظر آنے لگا اک انقلاب

اے تغیّر آفریں دل آج تجھکو کیا ہوا

والہانہ جو قدم راہِ وفا میں پڑ گیا

مرجع مقصود عالم اسکا نقش پا ہوا

خاک میں ملکر ہوئی تعمیر کی پھر آرزو

ذرہ ذرہ میرے دل کا خود بخود یکجا ہوا

چشم باطن پر کھلے اسراربزم کائنات

مجھکو ہرعالم نظرآتاہے اب دیکھا ہوا

باغ عالم کی ہوائیں ہیں مخالف کسقدر

غنچے بھی چٹکے تو میرے قلب کو دھڑکا ہوا

مجھکو بینائی عطا کی جب سربزم ازل

نورِ وحدت خود حجابِ دیدہ ء بینا ہوا

بے سبب دلمیں نہیں اٹھتی ہے یوں موجِ امّید

بحرِ ہستی سے ابھرتا ہے کوئی ڈوبا ہوا

ہم غبارِ کارواں کو دور تک دیکھا کیے

ہائے ہمکو چھوڑکر یوں کارواں چلتاہوا

سننے والا کون تھا، میری فریاد جرس

آگیا ہوں ترے درتک میں صدادیتا ہوا

ابر رحمت کیلیے ہوتا ندامت کا سبب

کس لیے پھرتا سرِ محشر میں گھبرایاہوا

کہہ رہی ہے مجھ سے خاک راہ تسلیم ورضا

سراٹھا بہرخدا، اب مرتبہ اعلےٰ ہوا

غورکر، اپنے فرائض پرذرا توغورکر

کیا مصور خاک میں ملنے  کو۔۔۔ تو پیدا ہوا

Home Page ہوم پیج

http://justuju-mosawwer.blogspot.com/