آرزو

وقتِ پیری میں کیا کہوں دل کو

آرزوئے شباب ہوتی ہے

آرزو

جو نظر آفتاب ہوتی ہے

آپ اپنا حجاب ہوتی ہے

موت یوں کامیاب ہوتی ہے

زندگی محوِ خواب ہوتی ہے

سانس لیتا ہوں جو پئے تسکیں

باعثِ اضطراب ہوتی ہے

دلِ بیکس سے جو صدا نکلے

مایہء انقلاب ہوتی ہے

طالبِ ذرہءفیض سے اپنے

ہستی آفتاب ہوتی ہے

روئے ہستی پہ آچکا ہے نکھار

آج وہ بے نقاب ہوتی ہے

پڑتی ہے ذرہ پر نظر جو مدام

غیرتِ آفتاب ہوتی ہے

دل وہ دل ہے دمِ سکوں جسکو

حسرتِ اضطراب ہوتی ہے

زندگی اور پھر محبت کی

ایک طرُفہ عذاب ہوتی ہے

وقتِ پیری میں کیا کہوں دل کو

آرزوئے شباب ہوتی ہے

متجسس جمالِ وحدت کی

نگہ انتخاب ہوتی ہے

ابتدائے عذابِ دل آخر

انتہائے ثواب ہوتی ہے

سن رہا ہوں کہ آج یورپ میں

قدر ام الکتاب ہوتی ہے

بارگاہِ جنون الفت میں

عقل کیوں باریاب ہوتی ہے

وہ  مصور ہے انتہائے سخن

بات  جو لاجواب ہوتی ہے

آسان اردو=جستجو میڈیا

پئے=واسطے، لیے۔ HomePage ہوم پیج مخزن غزلیات: سرورق