چمن بدری

چمن سے نکلے تو دیکھا نہ پھر چمن کا منہ

چھٹا ہے کیسے زمانہ میں آشیاں ہمسے

چمن بدری

لپٹ کے کہتی ہے یہ خاک رفتگاں ہم سے

وہ تم ہو روز جو ملتے تھے مہرباں ہم سے

پڑیگی خاک ترے منہ پہ خاکسار ہیں ہم

غبار رکھ نہ بہت دلمیں آسماں ہم سے

ہو ا یہ کہتی ہے گلشن کی بے ثباتی کی

بہار دور ہے، نزدیک ہے خزاں ہمسے

چمن میں کیا گل بازی ہمیں سمجھتا ہے

جو کھیلتا ہے یہ نیرنگ آسماں ہمسے

چمن کی سیر میں رہتا ہے ہمکو یہ کھٹکا

الجھ پڑے نہ کوئی خارِ گلستاں ہمسے

ہے پست رتبہ میں ہمسے وہ خاکسار ہیں ہم

بلند ہوکے، جھکے کیوں نہ آسماں ہمسے

نگاہِ یاس سے حسرت سے دیکھنے والے

سنیں نا! دردومصیبت کی داستاں ہمسے

ہوا میں خاک جو اڑتی ہے دیکھ اے عبرت

وہ کہہ رہی ہے سب احوالِ رفتگاں ہمسے

تری تلاش میں نالوں نے رہنمائی کی

چھٹا نہ راہ میں اشکوں کا کارواں ہمسے

چمن سے نکلے تو دیکھا نہ پھر چمن کا منہ

چھٹا ہے کیسے زمانہ میں آشیاں ہمسے

وہ خاکسار ہیں، بدلہ لیا نہ اس سے کبھی

بدل چکا ہے کئی بار آسماں ہمسے

وجود ہی تو ہمارا ہے تفرقہ کا سبب

ہوں بے نشاں تو ملیگا وہ بے نشاں ہمسے

مصّور اور کوئی نکتہ ہمکو یاد نہیں

کہ خوش جناب جگر سا ہے نکتہ داں ہمسے

نہیں ہے دور تو ہم سے یہاں جبینِ نیاز

ہزار دور سہی، اوسکا استاں ہم سے

یہ کہہ رہی ہیں محبت میں رفعتیں دل کی

رہا نہ جائیگا اب زیرِ آسماں ہم سے

نظر میں نور، تو دل میں خیال بنکے رہا

ہزار پردوں میں وہ کب رہا نہاں ہم سے

زمانے میں ہے مصور وہ اج بے قدری

نہ خوش ہوں بدلیں زباں بھی جو خوش بیاں ہمسے