درد دل

آگیا شاید مرے دلکو سکوں

اب نہیں آتی صدائے درد دل

درد دل

ہائے کیا شے ہے بلائے درد دل

بیخبر نا آشنا ئے درد دل

ہم سناتے ماجرائے درد دل

کوئی ملتا آشنائے درد دل

آگیا شاید مرے دلکو سکوں

اب نہیں آتی صدائے درد دل

ہوگیا چہرہ ابھی سے کیوں اداس

سننے والے ماجرائے دردِ دل

سازِ غم کے چھیڑنے والے ذرا

سن تو لے پہلے نوائے درد دل

ساکنان بزم عشرت الوداع

ہوچکی اب انتہائے درد دل

سننے والے دل تو اپنا تھام لے

کیاہنسی ہے! ماجرائے درد دل

چارہ گر بھی چپ ہیں نبضیں دیکھ کر

اب نہیں فکر دوائے دردِ دل

آرزو رخصت تمنّا الوداع

کچھ نہ ہو دل میں بجائے درد دل

حسرتِ آزار کو رسوا نکر

کہنے والے ابتلائے دردِ دل

بیکسی میں اے مصوّر کون ہے

مونس و ہمدم، سوائے دردِ دل

* * *

ایسی کچھ بھائی ادائے درد دل

منہ سے نکلی بس دعائے درد دل

ہوگئی خاموش بزم کائنات

تیرے صدقے اے نوائے درد دل

روئے عالم پر اوداسی چھاگئی

ہائے کیا تھی التجائے درد دل

دیکھی جاتی تھی نہ تمسے ابتدا

دیکھ لو اب انتہائے درد دل

آشنائے سوز وساز بزم جہاں

کون ہے اب ہمنوائے دردِ دل

میں ہوا اُسدن فغاں سے آشنا

پڑگئی جسدن بنائے درد دل

ساز غم کے چھیڑنے والے خموش

کوئی سن لیگا نوائے درد دل

راز دارضبط غم کرتے کسے

کس سے کہتے ماجرائے درد دل

دیکھتا ہوں بیخودی ء شوق میں 

دونوں عالم کو ندائے درد دل

حسرت بیداد میں جو لطف ہے

اسکو جانے بتلائے دردِ دل

راز ہستی کے کھلے جاتے ہیں سب

سن رہا ہوں میں صدائے درد دل

ذرہ ذرہ ہوگیا درد اشنا

اللہ اللہ ماجرائے درد دل

پوچھنے والے تری بیتابیاں

ہوگئیں ہمت فزائے درد دل

بس مصوّر ہوچکی اب ہوچکی

ابتدا و انتہائے درد دل

Home ہوم

http://mosawwerhomepage.blogspot.com/