کل من علیہا فان

کیا کہوں گورِ غریباں کی اداسی کیا کہوں

یہ  وہ دنیا ہے کہ جو بس کر بھی یوں سنسان ہے

کل من علیہا فان

دامِ  گیسوئے ظلوم میں اسیر انسان ہے

جانتا ہے گرچہ سب کچھ پھر بھی وہ انجان ہے

ہوں اسیر دامِ ہستی، کشمکش میں جان ہے

ہر نفس اک آرزو ہے ہر نفس ارمان ہے

کیا کہوں گورِ غریباں کی اداسی کیا کہوں

یہ  وہ دنیا ہے کہ جو بس کر بھی یوں سنسان ہے

یوں نہ قبریں روند تو اے محوِ آغازِ حیات

سونچ اے غافل تری منزل بھی گورستان ہے

ختم ہوجائے محبت میں تری عمرِ عزیز

یہ  بھی اک تفسیر *کل من علیھا فان ہے

چشم  حسرت ہی ہے خود وجہ *نِروَل سیل غم

زندگی ہے یا حوادث کا کوئی طوفان ہے

آشیانہ اپنا بامِ عرش پر ہوجائیگا

کچھ  نہیں مشکل اگر مدّ نظر امکان ہے

کاش   یاد آجائے اسکو بھول کر عہدِ ازل

ہوش کچھ انسان کو ہے، اور کچھ نسیان ہے

اعتدال اربع عناصر میں اگر پیدا کرے

پھر تو موجودات میں افضل یہی انسان ہے

خاک کے ذرّوں سے کی اسنے بنائے لامکاں

نارسا  ہوکر رسا، انسان کا عرفان ہے

ٹوٹتے ہی سب طلسمات محالات جہاں

دیکھتا ہوں جسطرف، امکان ہی امکان ہے

پائے نخوت سے وہ ٹھکرانا ہے خود قصرِعروج

اپنی پستی کا سبب دراصل خود انسان ہے

اک طلسمِ ہستیء موہوم ہے دنیا نہیں

تو مصور جان کر کیوں اسقدر انجان ہے

آسان اردو-جستجو میڈیا

نِرْوَل[نِر + وَل]-سنسکرت)

صفت  ذاتی-بے طاقت، کمزور، نحیف۔

سورہ ء رحمٰن: کل من علیہا فان۔ ویبقی وجہ ربک ذوالجلال والا کرام ۔ فبای آلا ء ربکما تکذبان ۔ ہر شے فناہوگی صرف باقی تیرے رب جلال و اکرام والے کا چہرہ ۔ کس کس نعمت کو جھٹلائوگے ۔